Enski boltinn

Klopp fór yfir hatur sitt á lands­leikja­hléum

Runólfur Trausti Þórhallsson skrifar
Klopp hatar landsleikjahlé.
Klopp hatar landsleikjahlé. EPA-EFE/PETER POWEL

Jürgen Klopp, þjálfari Liverpool, ræddi í dag við blaðamenn fyrir stórleik helgarinnar í enska boltanum þar sem lið hans mætir Arsenal. 

Meðal annars ræddi Klopp skoðun sína á landsleikjahléum en alls meiddust fjórir leikmenn liðsins í landsliðshléinu sem var að ljúka.

„Ég hata landsleikjahlé, ég hefði viljað spila helgina eftir tapið gegn West Ham United,“ sagði Klopp aðspurður hvort landsleikjahléið hefði komið á góðum tíma.

„Hléið hjálpaði okkur ekki neitt þegar kemur að meiðslum í hópnum,“ sagði Þjóðverjinn skapilli á fundi dagsins.

Jordan Henderson, Andy Robertson, Divock Origi og Sadio Mané meiddust allir í verkefnum með landsliðum sínum á undanförnum dögum. Svo virðist sem Origi og Mané séu búnir að jafna sig og verði klárir í bátana er Liverpool mætir Skyttunum.

„Hvorki Henderson né Robertson hafa æft með liðinu, þeir hafa verið í endurhæfingu. Við munum bíða eins lengi og hægt er með að taka ákvörðun hvort þeir geti spilað á morgun eður ei,“ sagði Klopp að endingu.

Liverpool situr sem stendur í 4. sæti ensku úrvalsdeildarinnar með 22 stig að loknum 11 umferðum. Arsenal er sæti neðar með 20 stig og gæti því farið upp fyrir Liverpool með sigri í leik liðanna á morgun.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.