Íslenski boltinn

Víkingar ekki bara tvö­faldir meistarar því þeir unnu í raun sex­falt í sumar

Óskar Ófeigur Jónsson skrifar
Sölvi Geir Ottesen og Kári Árnason með tvo bikara eftir síðasta tímabil sitt á ferlinum.
Sölvi Geir Ottesen og Kári Árnason með tvo bikara eftir síðasta tímabil sitt á ferlinum. Vísir/Hulda Margrét

Víkingur bættu um helgina bikarmeistaratitlinum við Íslandsmeistaratitilinn sinn frá því fyrir tveimur vikum og urðu þar með fyrstu tvöföldu meistarar karlafótboltans í heilan áratug.

Víkingar unnu samt ekki bara tvöfalt í sumar því í raun unnu þeir sexfalt og urðu fyrstir til þess síðan yfirburðalið Skagamanna náði því sumarið 1993.

Í fyrsta sinn í 28 ár vann því sama liðið alla titlana í boði hvort sem það eru liðstitlarnir tveir eða einstaklingstitlarnir fjórir.

Sumarið 1993 varð ÍA bæði Íslands- og bikarmeistari en að auki var Sigurður Jónsson kosinn besti leikmaður deildarinnar og Þórður Guðjónsson var síðan valinn sá efnilegasti. Þórður var einnig markakóngur og Skagamaðurinn Haraldur Ingólfsson var síðan stoðsendingakóngur.

Þessu hafði ekkert lið náð þar til í sumar þegar Víkingarnir náðu einnig sexu.

Víkingur varð fyrsta liðið frá 2011 til að vinna tvöfalt en að auki var Nikolaj Hansen kosinn besti leikmaður deildarinnar og Kristall Máni Ingason sá efnilegasti. Hansen varð síðan markakóngur deildarinnar og stoðsendingakóngurinn var Salvadorinn Pablo Punyed.

Eina annað liðið á þessari öld til þess að vinna tvöfalt, KR sumarið 2011, fékk bara þrenn verðlaun. Þeir unnu báða bikarana og svo var Hannes Þór Halldórsson kosinn leikmaður ársins. ÍBV átti efnilegasta leikmanninn (Þórarinn Ingi Valdimarsson), Stjarnan átti markakóng deildarinnar (Garðar Jóhannsson) og stoðsendingakóngarnir komu úr FH (Ólafur Páll Snorrason) og Keflavík (Guðmundur Steinarsson).

Frá því að farið var að verðlauna leikmann ársins og efnilegasta leikmann ársins 1984 hafa aðeins lið ÍA 1993 og lið Víkings 2021 unnuð tvennuna og þau verðlaun líka. Alls hafa sjö lið unnið tvennuna frá 1984.

Hér fyrir neðan eru einu liðið sem hafa náð að vinna fimmu eða sex í efstu deild karla síðan formlega var farið að taka saman stoðsendingar í deildinni.

  • Sexfalt hjá Víkingum sumarið 2021
  • Íslandsmeistarar
  • Bikarmeistarar
  • Leikmaður ársins (Nikolaj Hansen)
  • Efnilegasti leikmaðurinn (Kristall Máni Ingason)
  • Markakóngur (Nikolaj Hansen)
  • Stoðsendingakóngur (Pablo Punyed)
  • -
  • Sexfalt hjá Skagmönnum sumarið 1993
  • Íslandsmeistarar
  • Bikarmeistarar
  • Leikmaður ársins (Sigurður Jónsson)
  • Efnilegasti leikmaðurinn (Þórður Guðjónsson)
  • Markakóngur (Þórður Guðjónsson)
  • Stoðsendingakóngur (Haraldur Ingólfssson)
  • -
  • Fimmfalt hjá Skagmönnum sumarið 1992
  • Íslandsmeistarar
  • EKKI Bikarmeistarar (Valur vann)
  • Leikmaður ársins (Lúkas Kostic)
  • Efnilegasti leikmaðurinn (Arnar Gunnlaugsson)
  • Markakóngur (Arnar Gunnlaugsson)
  • Stoðsendingakóngur (Haraldur Ingólfssson)



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.