Íslenski boltinn

Pepsi Max tölur: Guy Smit bjargaði tvö­falt fleiri mörkum en sá næst­besti

Óskar Ófeigur Jónsson skrifar
Guy Smit ver skot í lokaleiknum á móti Víkingi.
Guy Smit ver skot í lokaleiknum á móti Víkingi. Vísir/Hulda Margrét

Nýliðar Leiknis héldu sæti sínu í Pepsi Max deild karla í sumar og það er ekki síst þökk sé hetjudáðum hollenska markvarðarins Guy Smit. Tölfræðin sýnir þetta svart á hvítu.

Vísir ætlar að kafa aðeins í tölfræði Wyscout frá nýloknu tímabili í Pepsi Max deild karla í knattspyrnu en þar má finna margt áhugavert nú þegar síðasti leikurinn hefur verið spilaður í Pepsi Max deild karla 2021.

Guy Smit var sá markvörður í deildinni sem bjargaði flestum mörkum með markvörslum sínum samkvæmt úttekt Wyscout.

Alls sá Smit til þess að Leiknisliðið fékk á sig 11,8 færri mörk en liðið hefði að öllu eðlilegu átt að fá á sig þegar kemur að markalíkum eða XG eins og það er skammstafað á ensku.

Guy Smit fékk á sig 30 mörk í leikjunum 22 en hann varði alls 91 skot eða fleiri en allir markmenn deildarinnar. Smit kom í veg fyrir hálft mark á hverjum níutíu mínútum sem hann spilaði.

Sá sem kom í fyrir næstflest mörk var markvörður Keflvíkinga, Sindri Kristinn Ólafsson, sem bjargaði 5,34 mörkum. Þriðji var síðan KA-markvörðurinn Steinþór Már Auðunsson sem bjargaði 5,26 mörkum.

Víkingurinn Ingvar Jónsson lék bara sjö leiki en náði samt sjötta sæti listans. Það var aðeins Guy Smit sem bjargaði fleiri mörkum á hverjar níutíu spilaðar mínútur.

Á hinum enda töflunnar var síðan HK-markvörðurinn Arnar Freyr Ólafsson sem fékk á sig 8,91 fleiri mörk en hann átti að fá á sig. Á undan honum var Fylkismarkvörðurinn Ólafur Kristófer Helgason sem fékk á sig 4,83 fleiri mörk en markalíkur gáfu tilefni til.

Ólafur Kristófer spilaði hins vegar aðeins fimm leiki og kom því ekki vel út á hverjar níutíu spilaðar mínútur.

  • Flestum mörkum bjargað af markvörðum Pepsi Max deildar karla 2021:
  • 1. Guy Smit, Leikni R. 11,75
  • 2. Sindri Kristinn Ólafsson, Keflavík 5,34
  • 3. Steinþór Már Auðunsson, KA 5,26
  • 4. Beitir Ólafsson, KR 3,29
  • 5. Hannes Þór Halldórsson, Val 2,35
  • 6. Ingvar Jónsson, Víkingi 1,74
  • -
  • Flest varin skot í Pepsi Max deild karla 2021:
  • 1. Guy Smit, Leikni R. 91
  • 2. Sindri Kristinn Ólafsson, Keflavík 90
  • 3. Steinþór Már Auðunsson, KA 79
  • 4. Aron Snær Friðriksson, Fylki 77
  • 5. Beitir Ólafsson, KR 70
  • 5. Hannes Þór Halldórsson, Val 70


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.