Liverpool á toppi ensku úrvalsdeildarinnar

Hjörtur Leó Guðjónsson skrifar
Liverpool er nú á toppi ensku úrvalsdeildarinnar.
Liverpool er nú á toppi ensku úrvalsdeildarinnar. Clive Brunskill/Getty Images

Liverpool kom sér í toppsæti ensku úrvalsdeildarinnar með 3-0 sigri gegn Crystal Palace. Sadio Mané og Mohamed Salah skoruðu báðir fyrir Liverpool eins og svo oft áður og Naby Keita bætti því þriðja við.

Heimamenn frá Bítlaborginni voru mun sterkari aðilinn þegar að liðin mættust í dag. Liðið var mun meira með boltann voru ógnandi fyrir framan mark gestanna.

Fyrsta mark leiksins skoraði Sadio Mané á 43. mínútu þegar að hann var fyrstur að átta sig eftir að Vicente Guaita hafði varið skalla Mohamed Salah. Mané tók þá frákastið og kom Liverpool í forystu rétt fyrir hálfleiksflautið.

Gestirnir í Crystal Palace voru ögn hættulegri í seinni hálfleik en þeim fyrri. Liverpool-menn hefðu líklega viljað skora annað mark til að tryggja sér sigurinn. Það tókst loksins rúmum tíu mínútum fyrir leikslok þegar að boltinn datt fyrir Mohamed Salah inni í vítateig Crystal Palace. Hann gerði engin mistök og kláraði færið vel.

Naby Keita gulltryggði svo sigurinn á 89. mínútu með frábæru marki. Vicente Guaita kýldi þá boltann frá eftir hornspyrnu, en þar var Keita mættur og hann smellhitti boltann á lofti og hann söng í netinu.

Eins og áður segir fer Liverpool upp í toppsæti ensku úrvalsdeildarinnar með 13 stig eftir fimm leiki. Crystal Palace situr í því þrettánda með fimm stig.

Bein lýsing

Leikirnir




    Velkomin á Vísi. Þessi vefur notar vafrakökur. Sjá nánar.