„Ég hef aldrei verið svona reiður“

„Ég er stoltur af strákunum sem komu inná, þeim sem fóru út af og þeim sem voru inná allan tímann. Það var hópurinn sem skapaði þetta stig fyrir okkur,“ sagði Arnar Þór á blaðamannafundi að leik loknum í dag.

Íslenska liðið spilaði afleitlega í fyrri hálfleiknum og langt inn í síðari hálfleikinn. Í hálfleik fóru allir leikmenn liðsins inn í klefa, líka varamenn sem venjulega hita upp úti á velli í leikhléinu.

„Ég öskraði svo mikið að ég missti röddina, ég öskraði í einhverjar þrjár mínútur og svo gekk ég út og Eiður Smári tók við. Ég hef aldrei verið svona reiður. Ég lofaði sjálfum mér að ég ætlaði ekki að vera þessi þjálfari en ég tapaði þeirri baráttu í dag,“ sagði Arnar Þór brosandi.

Íslenska liðið var í vandræðum með föst leikatriði í leiknum í dag, bæði sóknar- og varnarlega. Arnar Þór sagði að hópurinn þyrfti einfaldlega meiri tíma til að koma þessum hlutum í betra horf.

„Þetta er allt á okkar könnu og ábyrgðin er okkar,“ sagði Arnar Þór og átti þá við þjálfarateymið

„Við vorum að henda einföldum innköstum í lappirnar á andstæðingi, horn sem við fengum fóru ekki í rétt svæði og við fáum á okkur mörk þar sem er hlaupið fram fyrir okkur og skallað á nærsvæði. Þetta ræðum við en ábyrgðin er hjá mér.“

„Ég skal viðurkenna að þetta er sá hluti af fótboltanum sem maður hefði viljað fá meiri tíma til að æfa en það er erfitt í þessum þriggja leikja glugga. Við fengum tvær æfingar fyrir leikinn gegn Rúmeníu og eina fyrir þennan leik. Við erum að labba í gegnum þetta á einhverjum gönguæfingum en þetta þarf meiri athygli og meiri tíma.“

Arnar ræddi að það væri verið að henda ungum leikmönnum í djúpu laugina. Hann sagði það gríðarlega mikilvægt að hafa eldri leikmennina með í hópnum til að aðstoða þá yngri.

„Við getum ekki hent ellefu ungum leikmönnum í liðið á þessu stigi, þá tekur það mjög langan tíma að læra. Ég er þakklátur fyrir það hvað eldri leikmennirnir eru að gefa af sér. Þeir eru svekktir með stöðuna í riðlinum eins og allir en eru líka að hjálpa þeim ungu. Við þurfum að þróa liðið en mér finnst við líka þurfa að bera virðingu fyrir þessum eldri leikmönnum sem eru hérna og því sem þeir hafa gert fyrir íslenska landsliðið.“

Hann nefndi sérstaklega Birki Má Sævarsson sem var að leika sinn 100 landsleik í dag.

„Það er ótrúleg saga, 100 landsleikir. Þolþjálfarinn okkar sendi skilaboð eftir síðasta leik þegar hann skoðaði hlaupatölurnar hans. „This is fucking Premier League“.  Þessar tölur á þessum aldri er magnað,“ sagði Arnar Þór að lokum.