Deutche Welle segir lögregluna í Hessen hafa komið á fót fjörutíu manna rannsóknarnefnd til að komast til botns í málinu. Málið sé rannsakað sem tilraun til manndráps.
Lögreglan í Hessen segir eitri hafa verið komið fyrir í mjólkurfernum og vatnskönnum í mötuneyti einnar bygginga Tækniháskólans í Darmstadt. Eitrinu hafi verið komið fyrir yfir helgina en öll tilvik eitrunar komu upp í gær.
Lögreglan hefur lokað byggingunni sem um ræðir og fjarlægt öll matvæli úr henni. Þá mælir hún með því að allir með tengingu við háskólann sem sýna einkenni eitrunar, sér í lagi blánun útlima, leiti til læknis.
Enginn hefur tilkynnt um eitrun utan þeirra sjö sem gerðu það í gær en þeir eru allir á batavegi. Lögreglan telur enga bráðahættu vera enn þá vegna málsins.
