Marka­súpa gærdagsins: Sigur­mark Leiknis, mörk Skaga­manna, fyrsta mark Stefáns Árna og ó­vænt tvenna

Nýliðar Leiknis Reykjavíkur unnu óvæntan 1-0 sigur á Íslandsmeisturum Vals þökk sé glæsilegu marki Andrés „Manga“ Escobar þegar tæpar tíu mínútur lifðu leiks.

Í Fossvogi var KA frá Akureyri í heimsókn. Viktor Örlygur Andrason kom heimamönnum nokkuð óvænt yfir eftir átta mínútna leik en Rodrigo Gomes Mateo, eða einfaldlega Rodri, jafnaði metin um miðbik fyrri hálfleiks.

Kristall Máni Ingason kom Víkingum yfir á nýjan leik skömmu fyrir hálfleik og staðan því 2-1 er liðin gengu til búningsherbergja. Þannig var staðan allt fram á 86. mínútu þegar Rodri stökk hæst allra í teignum og jafnaði metin fyrir gestina.

Lokatölur í Víkinni 2-2 og eitt stig á lið niðurstaðan.

Það var mikið um jafntefli í umferðinni en KR og FH gerðu 1-1 jafntefli. Matthías Vilhjálmsson kom gestunum yfir með góðum skalla eftir hornspyrnu Jónatans Inga Jónssonar.

Stefán Árni Geirsson jafnaði metin þegar stundarfjórðungur var liðinn af leiknum eftir góðan undirbúning Kennie Chopart. Staðan orðin 1-1 og reyndust það lokatölur leiksins. Heimamenn í KR skoruðu þó tvö mörk sem voru dæmd af – annað vegna hendi í aðdraganda marksins og hitt vegna rangstöðu. Þá fékk Guðmundur Kristjánsson, miðvörður FH, reisupassann fyrir að fá tvö gul spjöld með stuttu millibili í síðari hálfleik.

ÍA jarðaði HK 4-1 í uppgjöri neðstu liða deildarinnar. Ekki kom að sök að Jóhannes Karl Guðjónsson, þjálfari Skagamanna, hafi fengið rautt spjald um miðbik fyrri hálfleiks.

Alexander Davey kom Skagamönnum yfir á 2. mínútu leiksins. Næstum klukkustund síðar kom Gísli Laxdal Unnarsson heimamönnum í 2-0 en Stefan Alexander Ljubicic minnkaði muninn skömmu síðar. Heimamenn svöruðu með tveimur mörkum undir lok leiks.

Steinar Þorsteinsson kom ÍA í 3-1 og Ísak Snær Þorvaldsson fullkomnaði sigurinn með fjórða marki ÍA skömmu síðar.

Þá gerðu Fylkir og Keflavík 1-1 jafntefli í endurkomu Ragnars Sigurðssonar í Árbæinn. Orri Hrafn Kjartansson kom heimamönnum yfir á 15. mínútu með skoti sem fór af varnarmanni. Það leit út fyrir að Fylkir myndi sigla þremur stigum í hús en varamaðurinn Oliver James Kelaart Torres jafnaði metin á 81. mínútu eftir klaufagang í vörn Fylkis.

Lokatölur því 1-1 í Árbænum.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.