Erlent

Teikna beina línu frá framboði Trumps til Rússa

Samúel Karl Ólason skrifar
Konstantin Kilimnik, Paul Manafort og Donald Trump.
Konstantin Kilimnik, Paul Manafort og Donald Trump. Vísir/FBI/EPA

Ríkisstjórn Joes Biden, forseta Bandaríkjanna, opinberaði í gær að samstarfsmaður starfsmanna framboðs Donalds Trump, fyrrverandi forseta, útvegaði rússneskum leyniþjónustum gögn úr framboðinu.

Þetta er í fyrsta sinn sem staðfest er að þeir Paul Manafort og Rick Gates útveguðu samstarfsmanni þeirra, Konstantin V. Kilimnik, gögn úr könnunum forsetaframboðs Trumps, sem hann útvegði svo rússneskum leyniþjónustum. Þetta var meðal þeirra spurninga sem Robert Mueller, sérstakur rannsakandi dómsmálaráðuneytis Bandaríkjanna, átti að svara.

Málið bendir til beinna tengsla á milli framboðs Trumps og yfirvalda í Rússlandi, sem beittu sér í hag forsetans fyrrverandi.

Í skjali frá fjármálaráðuneyti Bandaríkjanna sem birt var í gær og fjallaði um nýjar refsiaðgerðir gegn Rússlandi, segir að Kilimnik hafi fært Rússum upplýsingar um kannanir og stefnumál Trump-liða fyrir forsetakosningarnar 2016.

Ráðuneytið segir einnig að Kilimnig hafi einnig ýtt undir þá samsæriskenningu að það hafi í raun verið ríkisstjórn Úkraínu, ekki Rússlands, sem hafði afskipti af forsetakosningunum 2016.

Sjá einnig: Rússar reyndu að hafa áhrif á bandamenn Trump

Alríkislögregla Bandaríkjanna hefur heitið 250 þúsundum dala fyrir upplýsingar sem leiða til handtöku Kilimnik.

Paul Manafort, sem var um tíma kosningastjóri Trumps, var seinna meir dæmdur í fangelsi fyrir ýmis brot eins og banka- og skattsvik. Gates var aðstoðarmaður hans á þessum tíma. Trump náðaði Manafort í desember í fyrra.

Í frétt New York Times er ítrekað að í yfirlýsingu fjármálaráðuneytisins eru engar sannanir færðar fyrir þeirri staðhæfingu að Kilimnik hafi fengið gögnin frá Manafort og fært þau ráðamönnum í Rússlandi. Þar að auki sé ekki útskýrt af hverju Manafort útvegaði Kilimnik gögnin.

Fregnir hafa þó borist af því vestanhafs að Manafort hafi séð hag í því að koma sér í mjúkinn hjá auðjöfrum sem tengjast ríkisstjórn Rússlands. Þá myndu gögn sem þessi reynast Rússum vel varðandi afskipti þeirra af kosningunum.

Þá hafa fregnir af fundum Manafort og Kilimnik lengi legið fyrir. Þar á meðal í skýrslu Mueller, eins og farið er yfir í frétt Washington Post. Þar kom fram að Manafort og Kilimnik hittust í New York í ágúst 2016 og þá hafi fyrstu gögnin verið afhent.

Í kjölfarið hafi Manafort skipað Gates að senda Kilimnik reglulega gögn frá framboðinu.

Rick Gates sendi frá sér yfirlýsingu í gær þar sem hann sagði að gögnin sem Kilimnik hafi fengið hafi ekki verið leynileg. Þetta hafi verið einföld gögn úr könnunum framboðsins og aldrei nýjustu tölurnar. Þar að auki hafi þeir aldrei afhent Kilimnik upplýsingar um ætlanir framboðsins.


Tengdar fréttir

Náðar stuðnings- og stríðsglæpamenn

Donald Trump, fráfarandi forseti Bandaríkjanna, náðaði fimmtán manns og felldi niður dóma fimm manns í gær. Þar á meðal eru þrír fyrrverandi þingmenn Repúblikanaflokksins, tveir menn sem voru dæmdir í tengslum við Rússarannsóknina svokölluðu og fjórir öryggisverktakar sem voru dæmir fyrir þátt þeirra í fjöldamorði á fjórtán óvopnuðum Írökum á Nisour torgi í Bagdad árið 2007.

Barr kannast ekki við svindl og Giuliani ekki við náðunarspjall

William Barr, dómsmálaráðherra Bandaríkjanna, segir engar vísbendingar liggja fyrir um að stórfelld kosningasvik hefðu átt sér stað í nýafstöðnum forsetakosningum. „Hingað til höfum við ekki séð svindl af þeirri stærðargráðu að það hefði leitt til annarra úrslita í kosningunum,“ sagði Barr í viðtali við Associated Press.

Mueller var tregur í taumi en gagnorður um afskipti Rússa

Demókrata og repúblikanar reyndu að fá Mueller til að hjálpa málstað sínum en hann þráaðist við. Harðorðastur var hann um afskipti Rússa af kosningum og vilja framboðs Trump til að taka við aðstoð.

Skýrslan lýsir tilraunum Trump til að skaða rannsóknina

Þrátt fyrir að ekki sé mælt með ákæru í skýrslu Roberts Mueller lýsir hann tilraunum Trump forseta til að leggja stein í götu rannsóknarinnar, þar á meðal með því að vilja reka Mueller sjálfan.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.