Armenar líka án síns næstmarkahæsta leikmanns í dag

Langstærsta stjarna þjóðarinnar er óumdeilanlega Henrikh Mkhitaryan, leikmaður AS Roma og fyrrum leikmaður Arsenal, Man Utd og Borussia Dortmund. Hann var ekki í landsliðshóp Armena í þessari leikjatörn vegna meiðsla. Það var því löngu vitað að hann yrði ekki með í leiknum mikilvæga í dag.

Hins vegar hafa Armenar orðið fyrir öðru áfalli.

Mkhitaryan er markahæsti leikmaður armenska landsliðsins frá upphafi með 30 mörk en þar sem hann er ekki í hópnum er Gevorg Ghazaryan markahæsti leikmaður Armena af þeim sem eru í hópnum en hann hefur skorað fjórtán mörk í 73 landsleikjum.

Samkvæmt heimasíðu armenska knattspyrnusambandsins verður Ghazaryan ekki með Armenum í dag en hann hefur ekki náð að jafna sig af meiðslum eins og Armenar höfðu vonast til.

Leikur Íslands og Armeníu hefst klukkan 16:00 og verður í beinni textalýsingu á Vísi.