West Brom búið að bjóða í Schneiderlin

West Bromwich Albion hefur lagt fram þrettán milljóna punda tilboð í franska miðjumanninn Morgan Schneiderlin hjá Manchester United. Þetta fullyrðir BBC.

Schneiderlin er 27 ára og gekk í raðir Manchester United fyrir rúmu ári síðan. Þá kostaði hann félagið 27 milljónir punda, jafnvirði 3,7 milljarða króna.

Schneiderlin, sem sló í gegn með Southampton á sínum tíma, hefur ekki verið í náðinni hjá Jose Mourinho sem tók við stjórastarfinu hjá Manchester United í sumar.

Fleiri félög hafa áhuga, þeirra á meðal Everton sem er stýrt af Ronald Koeman, sem var þjálfari Schneiderlin hjá Southampton á sínum tíma.

„Ég vil ekki segja meira en að staðfesta okkar tilboð,“ sagði Tony Pulis, stjóri West Brom. „Við verðum að gæta sanngirni gagnvart leikmanninum og Manchester United.“