Palestínumenn hvattir til varna

Ísraelskir hermönnum og herskáum Palestínumönnum lenti saman á Gaza-svæðinu í gær. Níu manns féllu í átökunum, sem herþotur, skriðdrekar og jarðýtur Ísraelshers tóku þátt í. Palestínumennirnir lögðu jarðsprengjur fyrir ísraelsku hermennina.

Abu Obeida, talsmaður Hamas-samtakanna, sagði að vopnaðir liðsmenn samtakanna hefðu hafið átökin með því að skjóta á ísraelska hersmenn í njósnaleiðangri.

Að minnsta kosti sex hinna látnu voru Hamas-liðar. Samtökin staðfestu að einn þeirra hefði verið Mohammed Siam, herstjóri Hamas á Mið-Gaza.

Síðar skaut ísraelsk herþota eldflaugum á bækistöðvar skæruliða á svæðinu, að því er talsmaður hersins upplýsti. Sjúkrahússstarfsmenn sögðu tvo menn hafa farist. Talsmaður Hamas sagði þá báða hafa verið liðsmenn samtakanna.

Ismail Haniyeh, forsætisráðherra palestínsku stjórnarinnar sem Mahmoud Abbas Palestínuforseti vék frá í liðnum mánuði, og talsmaður Fatah-hreyfingar Abbas fordæmdu báðir þessar aðgerðir Ísraelshers og hvöttu Palestínumenn til að verjast.