Varpa ljósi á fjölmörg kynferðisbrot lögregluþjóna

Hundruðum lögregluþjóna í Bandaríkjunum hefur verið sagt upp störfum vegna kynferðisbrota. Líklega er talan þó mun hærri en gögn segja til um. AP fréttaveitan hefur undanfarið ár rannsakað ásakanir gegn lögregluþjónum og farið yfir fjölda dómsskjala og önnur gögn til að varpa ljósi á umfang kynferðisbrota lögreglujóna.

Rannsóknin nær frá árinu 2009 til og með 2014.

AP komst að því að lögregluþjónar hafa meðal annars verið reknir fyrir nauðgun, þvinguð munnmök, barnaníð, sifjaspell, kynferðislegt áreiti, tilraun til nauðgunar og vörslu barnakláms. Einn þriðji þeirra sem hafa verið reknir voru reknir vegna atvika sem sneru að börnum undir lögaldri.

Líklega umfangsmeira en gögnin segja til um

AP segir ljóst að lögreglumenn sem gerðust sekir um sambærileg brot sé fleiri í raun. Bæði New York fylki og Kalifornía höfðu engin gögn um brottrekstra lögreglumanna vegna brota í starfi. Þá voru ríki þar sem gögnin sögðu að enginn hefði verið rekinn vegna kynferðisbrota. Þó væri ljóst að það hefði gerst þegar farið var yfir dómsgögn og fréttir.

Þá segir Bernadette DiPino, sem hefur rannsakað þennan vanda fyrir Samtök lögreglustjóra í Bandaríkjunum, að líklegast hafi slíkt brot átt sér stað í hverju einasta umdæmi í Bandaríkjunum. Hún segir að fólk sé hrætt við að stíga fram og saka lögreglumann um að hafa brotið af sér. Fólk óttist að afleiðingarnar gætu orðið þær að lögreglan snerist gegn sér.

Þar að auki sögðu nokkrir lögmenn og jafnvel lögreglustjórar að málin væru kæfð svo lögreglan þyftu ekki að greiða bætur. Þess í stað sé lögreglumönnum sem hafi brotið af sér leyft að segja hljóðlátlega upp. Eftir það hafi þeir jafnvel sótt um í öðrum umdæmum og fengið þar vinnu.

Árið 2007 voru rúmlega 70 lögreglustjórar komnir saman á fundi. Þá var þeirri spurningu varpað fram hvort að þeir hefðu þurft að bregðast við því að lögregluþjónn í umdæmum þeirra hafi verið ásakaður um kynferðisbrot. Nærri því allir réttu upp hönd.

Braut gegn 13 konum

AP fjallar vandlega um mál Daniel Holtzclaw sem á nú yfir höfði sér 36 ákærur fyrir brot gegn þrettán konum í umdæmi sínu. Yngsta konan sem hann braut gegn var sautján ára þegar hann er sagður hafa nauðgað henni fyrir utan heimili hennar.

„Ég vissi ekki hvað ég átti að gera. Hvað átti ég að gera? Hringja á lögregluna? Hann var lögreglan,“ er haft eftir henni. 

Flestar konurnar höfðu glímt við eiturlyfjafíkn og komist í kast við lögin í gegnum tíðina. Konur sem AP ræddi við segja margar hverjar að saga þeirra þeirra hafi verið notuð gegn þeim af lögregluþjónum sem brutu gegn þeim.