WHO varar við útgáfu ónæmisvottorða

Alþjóðaheilbrigðismálastofnunin (WHO) gaf í gær út yfirlýsingu þar sem ítrekað var að ekki væru óyggjandi sannanir fyrir því að ekki væri hægt að smitast aftur af kórónuveirunni sem valdið getur Covid-19 sjúkdómnum. Af þeirri ástæðu varar stofnunin við því að ríki heims gefi út sérstök ónæmisvottorð til þeirra sem smitast hafa af veirunni og náð sér aftur.

Hugmyndin á bak við slíkt skírteini væri að auka frelsi þeirra sem taldir eru ónæmir fyrir veirunni til þess að ferðast, snúa aftur til vinnu eða annað slíkt.

„Eins og stendur eru engar sannanir fyrir því að fólk sem hefur náð sér af Covid-19 og myndað mótefni, sé varið fyrir annarri sýkingu.“

Þannig gæti útgáfa slíkra ónæmisvottorða leitt til aukinnar útbreiðslu veirunnar, þar sem fólk sem teldi sig ónæmt gæti borið hana í aðra.

Þórólfur Guðnason sóttvarnalæknir sagði fyrr í þessum mánuði að til skoðunar væri að gefa út vottorð lík þeim sem WHO varar við hér á landi.