Stjórnvöld í Bæjaralandi hafa tilkynnt að ekkert verði úr Oktoberfest í ár vegna faraldurs kórónuveirunnar.
Yfirvöld í Þýskalandi höfðu þegar tilkynnt að allar stærri samkomur yrðu bannaðar í landinu til loka ágústmánaðar.
Þrátt fyrir Októberfest hafi verið fyrirhuguð eftir að því banni lyki tilkynnti Markus Söder, forsætisráðherra Bæjaralands, í gær að hátíðin í ár yrði blásin af.
Sagði hann í samtali við fréttamenn í gær að borgarstjóri München hafi verið honum sammála um að farsælast væri að aflýsa hátíðahöldunum í ár.
Hátíðin átti að hefjast þann 19. september og standa til 4. október.
Áætlað er að um sex milljónir manna komi alla jafnan saman á Októberfest til að gera sér glaðan dag, en bjór er þar í hávegum hafður.
