Það eru fimmtán ár í dag síðan Bergkamp skoraði þetta sturlaða mark | Myndband

„Þið munið ekki sjá mörg mörk eins og þetta. Þetta var ótrúlegt mark.“

Þetta sagði heldur betur glaðbeittur Arsene Wenger, knattspyrnustjóri Arsenal, eftir leik Arsenal og Newcastle í ensku úrvalsdeildinni 2. mars 2002, fyrir sléttum fimmtán árum síðan.

Markið sem hann talaði um var eitt fallegasta mark í sögu ensku úrvalsdeildarinnar en það skoraði hollenski snillingurinn Dennis Bergkamp á hreint ótrúlegan hátt.

Hann fékk sendingu að teignum frá Robert Pires og sneri bakinu í varnarmanninn Nikos Dabizas sem stóð fyrir aftan hollenska landsliðsmanninn. Með einni undrasnertingu sneri Bergkamp boltann framhjá Dabizas, steig hann svo út og renndi boltanum í netið framhjá Shay Given.

„Ég vildi fá boltann í hlaupið en hann kom fyrir aftan mig. Ég bjóst ekki við því þannig ég hugsaði að mig skorti aðra hugmynd,“ skrifar Bergkamp um markið fræga í ævisögu sinni.

„Ég vissi að varnarmaðurinn var að koma í bakið á mér og hraðinn á boltanum gat hjálpað mér. Tíu jördum áður en boltinn barst til mín tók ég ákvörðun um að snúa varnarmanninn af mér.“

Markið var ekki bara fallegt heldur mikilvægt. Arsenal var í harðri baráttu um enska meistaratitilinn og í leit að tvennunni þetta tímabilið. Newcastle var í öðru sæti fyrir leikinn en 2-0 sigur Arsenal kom því í góða stöðu.

Skytturnar tryggðu sér svo enska titilinn með sigri á Manchester United á Old Trafford í byrjun maí, fjórum dögum eftir að verða bikarmeistarar eftir sigur á Chelsea á Wembley.

Sky Sports er með skemmtilega umfjöllun um markið í dag sem má lesa hér.