„Það er aðeins meiri fótbolti hjá honum“

Arnór Ingvi Traustason, landsliðsmaður Íslands í knattspyrnu sem og leikmaður sænska liðsins Malmö, var í viðtali í hlaðvarpsþættinum Fotbollskanalen nýverið. Aðal umræðuefnið var Erik Hamrén, núverandi landsliðsþjálfari Íslands.

Þáttinn má finna í heild sinni hér.

Hinn sænski Hamrén tók við íslenska liðinu eftir frábært gengi þess bæði á Evrópumótinu í Frakklandi árið 2016 og svo á heimsmeistaramótinu í Rússlandi tveimur árum síðar. Hann byrjaði þó ekki vel þar sem Ísland mætti Sviss og Belgíu í Þjóðadeildinni.

„Hann þurfti að aðlaga sig að því sem virkaði fyrir okkur,“ segir Arnór Ingvi um byrjun Hamrén áður en hann hrósaði þeim sænska.

„Hann er góður þjálfari líka. Ísland er nálægt því að komast á Evrópumótið, við unnum Tyrkland og höfum spilað góðan fótbolta. Við lentum í vandræðum gegn Sviss og Belgíu en annars held ég að við séum farnir að skilja hann betur og hann okkur, það er hugmyndafræði íslenska liðsins.“

Arnór vildi þó ekki bera Hamrén saman við Lars Lag­er­bäck, hann segir það ómögulegt þó þeir séu báðir frá Svíþjóð. Sá síðarnefndi þjálfaði íslenska liðið frá 2012 til 2016 og kom því meðal annars á Evrópumótið í Frakklandi. Var það í fyrsta skipti sem íslenska karlalandsliðið komst á stórmót í knattspyrnu.

„Það er aðeins meiri fótbolti hjá Hamrén. Honum líkar vel við leikkerfið 4-3-3 en við spilum í grunninn 4-5-1. Hann vill að við reynum að spila boltanum meira með jörðinni en við höfum gert áður, fyrir utan það er þetta mjög svipað.“

Að lokum er Arnór spurður út í yngri leikmenn á Íslandi en Hamrén hefur mikið unnið með sama kjarna og Lagerback og Heimir á undan honum.

„Það er nóg af hæfileikaríkum leikmönnum að koma upp og komandi kynslóð er mjög spennandi,“ sagði hann að lokum.