Sjáðu magnað mark Gylfa Þórs er Everton hóf undirbúningstímabilið

Enska úrvalsdeildarfélagið Everton hefur hafið undirbúningstímabil sitt fyrir komandi leiktíð. Landsliðsmaðurinn Gylfi Þór Sigurðsson fer einkar vel af stað en hann skoraði tvö og lagði upp eitt í 3-3 jafntefli liðsins gegn Blackpool.

Segja má að undirbúningstímabilið gæti ekki hafa farið verr af stað en Everton voru lentir 3-0 undir eftir aðeins ellefu mínútna leik.

Gylfi Þór lagði upp fyrsta mark Everton í dag en það gerði Dominic Calvert-Lewin á 23. mínútu. Sjö mínútum síðar minnkaði Gylfi Þór muninn og staðan því 3-2 í hálfleik. Gylfi jafnaði svo metin á 72. mínútu með frábæru marki beint úr aukaspyrnu og lauk leiknum með 3-3 jafntefli.

Hér að neðan má sjá aukaspyrnumark Gylfa í leiknum en hann smurði boltann einfaldlega upp í samskeytin.