Réttarhöldin yfir Benjamín Netanjahú, forsætisráðherra Ísraels, hefjast 17. mars, tveimur vikum eftir þingkosningarnar í landinu. Ríkissaksóknari Ísraels ákærði forsætisráherrann formlega 28. janúar fyrir mútur, fjár- og umboðssvik. Réttarhöldin gætu staðið yfir í marga mánuði og jafnvel ár en honum ber engin skylda til að segja af sér í millitíðinni.

Kosningarnar sem eru á dagskrá í byrjun næsta mánaðar eru þær þriðju á innan við ári en engin þeirra hefur skilað afgerandi niðurstöðu. Skoðanakannanir nú í aðdraganda kosninga gefa ekki til kynna að nein breyting verði þar á. 

Benny Gantz, leiðtogi stjórnarandstöðunnar, sem hefur staðfastlega neitað að vinna með Netanjahú, hefur látið hafa eftir sér að hann muni vinna að því að bæta sambandið við Demókrataflokk Bandaríkjanna hljóti hann brautargengi í kosningunum.

Netanjahú hefur farið þveröfuga leið í sinni nálgun og lagt aðaláherslu á samband sitt við Donald Trump, Bandaríkjaforseta en Netanjahú hefur verið ásakaður um að vanrækja samband sitt við Demókrata í leiðinni.  

Gantz sagði að afar mikilvægt sé að stuðla að öflugu sambandi við Bandaríkin og í því sambandi skipti ekki máli hvort það verður Repúblikani eða Demókrati sem verður næsti forseti Bandaríkjanna.