United þurfti að víkja fyrir dansstjörnum

Manchester United gat ekki gist á Lowry-hótelinu í Manchester fyrir leikinn gegn Tranmere Rovers í ensku bikarkeppninni í dag.

Hótelið hafði verið bókað fyrir dansara í hinum vinsæla sjónvarpsþætti, Strictly Come Dancing.

United-liðið dvelur oftast á Lowry-hótelinu fyrir leiki en það var ekki í boði að þessu sinni.

Þess í stað gisti United-liðið á hóteli í Liverpool fyrir leikinn gegn Tranmere sem er í 21. sæti ensku C-deildarinnar.

United hefur tapað þremur af síðustu fimm leikjum sínum og Ole Gunnar Solskjær, knattspyrnustjóri United, er undir mikilli pressu.

Leikur Tranmere og United hefst klukkan 15:00 og verður sýndur beint á Stöð 2 Sport.