Á meðan að Bretar vinna nú að því að koma samfélaginu í samt horf eftir sóttvarnaaðgerðir vegna kórónuveirufaraldursins hafa þarlend stjórnvöld ákveðið að taka sex ríki af lista yfir örugg lönd.
Þurfa ferðalangar frá Frakklandi, Hollandi, Möltu, Mónakó og Karíbahafseyjunum Arúba og Turks- og Caicoseyjum að sæta fjórtán daga sóttkví við komuna til Bretlands. Hefur faraldrinum vaxið ásmegin í ríkjunum sex á undanförnum vikum.
Data shows we need to remove France, the Netherlands, Monaco, Malta, Turks & Caicos & Aruba from our list of #coronavirus Travel Corridors to keep infection rates DOWN. If you arrive in the UK after 0400 Saturday from these destinations, you will need to self-isolate for 14 days.
— Rt Hon Grant Shapps MP (@grantshapps) August 13, 2020
Samgönguráðherra Bretlands, Grant Shapps, greindi frá ákvörðun stjórnvalda í dag og sagði hana taka gildi á laugardag en Reuters greinir frá.
Forsætisráðherra Bretlands, Boris Johnson, minnti þá samlanda sína á það í dag að þrátt fyrir að slakað yrði á aðgerðum vegna veirunnar verði enn refsað fyrir brot gegn sóttvarnarreglum og að stjórnvöld myndu ekki hika við að setja á frekari takmarkanir að nýju.
