Stálu bílnum hans Fabinho og skartgripum er hann fagnaði titlinum

Brotist var inn til Fabinho, miðjumanns Liverpool, á meðan hann fagnaði bikarafhendingunni hjá Liverpool á miðvikudaginn.

Brotist var inn á heimili Brasilíumannsins þegar enginn var heima á miðvikudaginn en talið er að farið hafi verið inn í húsið á milli þrjú að degi til og til fjögur morguninn eftir.

Skartgripir voru teknir af heimili Fabinho í Formby en einnig var Audi RS6 bíll hans tekinn. Hann fannst þó síðar í kringum bæinn Wigan.

Talið er að þjófarnir hafi farið inn þegar Fabinho var á Anfield að lyfta enska meistaratitlinum en fjölskylda Fabinho var heldur ekki, sem betur fer, heima.

Hann er ekki fyrsti Liverpool-maðurinn sem brotist er inn til á síðustu árum en þegar Liverpool spilaði gegn Bayern Munchen á síðasta ári þá var brotist inn til Sadio Mane.