Moyes vill kaupa tvo leikmenn frá Man Utd

David Moyes, knattspyrnustjóri West Ham, er sagður hafa áhuga á að fá í sínar raðir tvo leikmenn frá Manchester United, þá Jesse Lingard og Phil Jones.

Moyes er kominn langleiðina með að bjarga West Ham frá falli, eftir fjögur stig í síðustu tveimur leikjum. Hann bjargaði Hömrunum frá falli árið 2018 en fékk ekki að halda áfram með liðið og í stað hans var ráðinn Manuel Pellegrini. 

Núna er búist við því að Moyes fái að halda áfram með West Ham á næsta tímabili og hefur hann hug á því að kaupa Jesse Lingard og Phil Jones frá Manchester United, svo lengi sem West Ham heldur sæti sínu í ensku úrvalsdeildinni. Skotinn þekkir vel til þeirra Lingard og Jones, en hann þjálfaði þá hjá Man Utd árin 2013-14. 

Á meðan ætlar Ole Gunnar Solskjær að hreinsa til hjá Manchester United og er fastlega gert ráð fyrir að Lingard og Jones verði ofarlega á tiltektarlistanum. West Bromwich Albion og Everton eru einnig sögð áhugasöm um Jesse Lingard.