Schmeichel valinn besti markvörður í sögu ensku úrvalsdeildarinnar

Match of the Day þríeykið Gary Lineker, Alan Shearer og Ian Wright, allt miklir markaskorar og enskir landsliðsmenn á sínum tíma, vildu vita hvað hinn almenni stuðningsmaður telur vera besta markvörð í sögu ensku úrvalsdeildarinnar.

Gerðu þeir lista og leyfðu svo hlustendum MOTD hlaðvarpsins að velja en alls bárust 160 þúsund atkævði. BBC greinir frá. 

Þrír af þeim 10 markvörðum sem voru valdir eru enn að spila í deildinni.

1. Peter Schmeichel (Manchester United, Aston Villa og Manchester City)

Leikir í deildinni: 310

Haldið hreinu: 128

Daninn stóri og stæðilegi gerði garðinn frægan með Manchester United á tíunda áratug síðustu aldar og var hann stór ástæða fyrir frábæru gengi liðsins. Var hann fyrirliði í fjarveru Roy Keane þegar liðið tryggði sér þrennuna árið 1999 með 2-1 sigri á Bayern Munich í úrslitum Meistaradeildarinnar.

Gary Lineker: „Hann var besti markvörður sem ég spilaði gegn á mínum tíma í deildinni. Ótrúlegur markvörður.“

Ian Wright: „Ég skoraði aðeins gegn honum í æfingaleikjum. Hann var eini markvörðurinn sem ég hugsaði um fyrir leiki, hann var það góður.“

2. Petr Cech (Chelsea og Arsenal) 

Leikir í deildinni: 443

Haldið hreinu: 202

Maðurinn sem José Mourinho fékk til að múra fyrir markið sitt þegar hann kom fyrst til Englands. Sló Carlo Cudcini, einn besta markvörð deildarinnar á þeim tíma, strax úr liðinu og átti ótrúlegan feril í kjölfarið.

Var á leiðinni að vera besti markvörður allra tíma þegar Stephen Hunt höfuðkúpubraut hann í leik Reading og Chelsea árið 2008.

Lineker: „Cech hélt hreinu í næstum helming allra leikja sem hann lék í úrvalsdeildinni. Hann vann úrvalsdeildina fjórum sinnum, FA bikarinn fimm sinnum, deildarbikarinn þrisvar, Evrópudeildina og Meistaradeildina, var fjórum sinnum sá markvörður sem hélt oftast hreinu og níu sinnum valinn besti leikmaður Tékklands.“

3. Edwin van Der Sar (Fulham og Manchester United) 

Leikir í deildinni: 313

Haldið hreinu: 132

Lineker: „Van der Sar sýndi mikilvægi þess að hafa góðan markvörð í nútíma knattspyrnu þar sem Man Utd tók langan tíma í að finna arftaka Schmeichel.“

Alan Shearer: „Við tölum um Alisson og Ederson og hvernig þeir hafa breytt markvörslu en Van der Sar gat spilað, enginn vafi á því að hann gat sent boltann jafn vel og hver annar.“

Wright: „1311 mínútur án þess að fá sig mark, heimsmet.“

4. David Seaman (Arsenal og Manchester City)

Leikir í deildinni: 340

Haldið hreinu: 140

Lineker: „Hann er rólegasti markvörður sem ég hef hitt á ævinni.“

Wright: „Frá því hann kom í búningsklefann í Arsenal þá var hann svo rólegur og hann gerði alla aðra rólega líka. Hann hjálpaði mér mikð á ferlinum.“

5. David De Gea (Manchester United)

Leikir í deildinni: 304

Haldið hreinu: 108

Shearer: „Mikið gagnrýndur þegar hann kom fyrst í deildina en hann hefur síðan snúið því við og var stórkostlegur í fleiri ár. Er þó að gera of mörg mistök sem stendur.“

Wright: „Ég veit ekki hvar Man Utd væri án hans.“

Lineker: „Sumar af markvörslunum hans eru einfaldlega út í hött.“

6. Alisson (Liverpool)

Leikir í deildinni: 58

Haldið hreinu: 31

Lineker: „Hefur verið ótrúlega góður og gjörsamlega umturnað Liverpool liðinu.“

Shearer: „Alisson og Virgil van Dijk hafa breytt Liverpool liðinu algjörlega.“

7. Ederson (Manchester City) 

Leikir í deild: 99

Haldið hreinu: 45

Shearer: „Frábær fyrir Man City. Hefur unnið titla og að hluta til breytt því hvernig markverðir þurfa að vera í dag.“ Shearer: „Hann er betri en sumir af útileikmönnunum sem ég spilaði með.“

Wright: „Er með frábæra fótboltahæfileika.“

8. Jens Lehman (Arsenal)

Leikir í deild: 148

Haldið hreinu: 54

Wright: „Hann var leiðtogi í búningsklefanum.“

9. Shay Given (Newcastle United) 

Leikir í deild: 451

Haldið hreinu: 113

Wright: „Var frábær í að verja skot og magnaður íþróttamaður.“

Shearer: „Hann var magnaður atvinnumaður en ekki sá besti í fótunum.“

10. David James (Liverpool, Aston Villa, West Ham United, Man City og Portsmouth) 

Leikir í deild: 572

Haldið hreinu: 169

Shearer: „Hann lék mörg hundruð leiki í deildinni og langt fram eftir aldri. Þú þarft að vera góður markvörður til að endast jafn lengi og hann gerði í ensku úrvalsdeildinni.“