Enrique vann keppni atvinnumanna í FIFA 13

Atvinnumenn í knattspyrnu hafa mikinn frítíma á milli æfinga og ansi margir þeirra nýta þann frítíma í að spila FIFA-tölvuleikinn sem er afar vinsæll um allan heim.

Nýjasta útgáfa leiksins var að koma út og hafa verið ýmsar uppákomur á vegum útgefandans síðustu daga vegna viðburðarins.

Knattspyrnustjörnur tóku meðal annars þátt í keppni hver væri bestur. Þeir sem tóku þátt voru Jose Enrique, Joe Hart, Ashley Young og Elliott Bennett.

Hinn lipri bakvörður Liverpool, Enrique, valtaði yfir andstæðinga sína og virðist eiga nokkra klukkutíma í leiknum undir beltinu.

"Hann slátraði Hart 5-0. Það er ekki hægt að vinna hann. Ég hef heyrt að hann spili nánast allan sólarhringinn," sagði John Ruddy, markvörður Norwich, en hann fylgdist með keppninni.