Shinawatra lofar að opna budduna

Thaksin Shinawatra, eigandi Manchester City, hefur staðfest að Sven-Göran Eriksson muni fá þá peninga sem hann þarf til að kaupa leikmenn í janúarglugganum. Shinawatra er ánægður með störf Svíans í haust.

Shinawatra pungaði út 40 milljónum punda í sumar til að styrkja liðið og þó yfir milljarður punda af eignum hans í Tælandi hafi verið frystar, ætlar hann ekki að láta það hafa áhrif á sig þegar kemur að janúarglugganum.

"Við kaupum ekki eins marga leikmenn og við gerðum í sumar, en þó verða einhverjir leikmenn keyptir. Ég treysti Sven vel til að kaupa góða leikmenn enda hefur hann staðið sig mjög vel. Við gerðum þriggja ára áætlun á sínum tíma og þó margir vilji meina að við séum á undan áætlun með liðið - eru nú aðeins 10 leikir búnir á tímabilinu. Liðið hefur samt byrjað vel og margir af stuðningsmönnunum sem efuðust virðast vera að taka okkur núna," sagði Shinawatra.