Fellaini: Man Utd voru of fljótir að reka Mourinho

Belgíski miðjumaðurinn Marouane Fellaini hefur áhyggjur af stefnu Manchester United í þjálfaramálum en síðan Sir Alex Ferguson hætti vorið 2013 hafa þrír stjórar verið reknir frá störfum hjá þessu sigursælasta liði ensku úrvalsdeildarinnar.

„Þeir fengu inn einn besta stjóra heims í Jose Mourinho. Hann vildi fá að byggja upp lið en var rekinn. Það er ekki auðvelt að búa til lið á svo stuttum tíma, þú þarft meira en tvö ár,“ segir Fellaini.

„Ég veit ekki hvað þeir munu gera við Solskjær en ef þú ætlar að vinna til verðlauna og bæta liðið þarf stjórinn að fá tíma. Mourinho gerði stórkostlega hluti á fyrsta tímabili sínu; hann bætti liðið og vann bikara. Annað tímabilið var erfiðara en hann gerði sitt besta til að hjálpa liðinu og svo var hann rekinn.“

„Þeir voru of fljótir að láta hann fara. Þegar þú ert með stjóra á borð við hann þarf hann marga leikmenn til að koma sinni hugmyndafræði að. Hann vildi byggja lið en er svo látinn fara eftir tvö og hálft ár því úrslitin voru ekki að detta,“ segir Fellaini.

Fellaini gekk til liðs við Man Utd þegar David Moyes tók við liðinu og fór Belginn því í gegnum allar þessar þjálfarabreytingar á sex ára ferli sínum hjá Man Utd áður en hann gekk í raðir kínverska liðsins Shandong Luneng í byrjun þessa árs.

„Þeir fengu Moyes inn en gáfu honum ekki tíma. Þá var Van Gaal fenginn inn. Hann fékk tvö ár og við vorum farnir að gera góða hluti, unnum bikarinn en þá er hann rekinn því þeir vildu vinna meira strax. Ef þú ætlar að byggja upp lið þarftu að gefa því tíma; ekki skipta um þjálfara á hverju ári eða tveggja ára fresti,“ segir Fellaini.