Erlent

Olíuframleiðsla í Sádi-Arabíu dregst saman eftir drónaárásir

Vésteinn Örn Pétursson skrifar

Olíuframleiðsla í Sádi-Arabíu hefur dregist verulega saman í dag eftir drónaárásir á tvær af stærstu olíuframleiðslustöðvar landsins. Stöðvarnar eru í eigu ríkisfyrirtækisins Aramco, en hinir jemensku Húta-uppreisnarmenn hafa lýst yfir ábyrgð á árásunum.

Reuters-fréttastofan hefur eftir heimildamanni að árásirnar hafi valdið því að olíuframleiðsla hafi dregist saman um fimm milljónir tunna á dag, en það er um helmingur þess sem Sádi-Arabía flytur út á degi hverjum.

Talsmaður Húta-uppreisnarmannanna segir að tíu drónar hafi verið notaðir til verksins. Yfirvöld hafa náð tökum á eldum sem kviknað hafa í kjölfarið en ekki liggja fyrir upplýsingar um manntjón eða skemmdir vegna árásanna.

Aramco er stærsta olíuvinnslufyrirtæki heims og stærri stöðin sem ráðist var á framleiðir um eitt prósent allra olíubirgða heims. Gætu truflanir í framleiðslu haft áhrif á framboð og verðmyndun á olíu á heimsmarkaði.

Hútar hafa lýst því yfir að von gæti verið á fleiri árásum en Sádar leiða fjölþjóðlega hersveit sem berst gegn samtökunum í Jemen.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.