Erlent

Eyðing Amasonfrumskógarins hátt í tvöfaldast undir Bolsonaro

Kjartan Kjartansson skrifar
Amazonfrumskógurinn bindur gríðarlegt magn kolefnis. Gengið er á hann hratt með ólöglegu skógarhöggi og búgriparækt.
Amazonfrumskógurinn bindur gríðarlegt magn kolefnis. Gengið er á hann hratt með ólöglegu skógarhöggi og búgriparækt. Vísir/EPA

Um 920 ferkílómetrum Amasonskógarins í Brasilíu var eytt í síðasta mánuði en það er 88% aukning frá sama mánuði í fyrra. Gagnrýnendur Jairs Bolsonaro, forseta Brasilíu, fullyrða að árásir hans á umhverfisstofnun landsins gefi skógarhöggsmönnum og búgarðseigendum byr undir báða vængi að ganga á skóginn.

Gögn brasilísku geimvísindastofnunarinnar benda til þess að skógareyðing í Amason hafi numið 4.565 ferkílómetrum á ellefu mánuðum frá síðasta sumri. Það er 15% aukning frá sama tímabili árið áður, að sögn Reuters-fréttastofunnar.

Bolsonaro forseti hefur boðað stórfellda nýtingu á Amasonfrumskóginum frá því að hann tók við embætti í janúar. Þá hefur hann gagnrýnt umhverfisstofnun landsins harðlega fyrir að gefa út of margar sektir vegna skógarhöggs þar.

Ricardo Salles, umhverfisráðherra Brasilíu, segir að gripið verði til aðgerða til að taka á ólöglegu skógarhöggi.

Þrýstingur er á brasilísk stjórnvöld að koma í veg fyrir eyðingu Amasonskógarins. Þannig eru ákvæði um það að finna í fríverslunarsamningi sem Evrópusambandið og Mercosur, efnahagsbandalag Suður-Ameríkuríkja, handsöluðu í síðustu viku.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.