Erlent

Sagður hafa gert út mansalshring úr kjallara foreldra sinna

Vésteinn Örn Pétursson skrifar
News 12 long island

Bandarískur karlmaður á fimmtugsaldri er sakaður um að hafa einn síns liðs gert út mansalshring úr kjallara foreldra sinna í New York um árabil. Saksóknarar í málinu segja hann hafa herjað á ungar konur háðar fíkniefnum og neytt þær til kynferðislegra athafna með öðrum mönnum í skipti fyrir peninga og fíkniefni.

Maðurinn er 47 ára og heitir Raymond Rodio III. Þann 17. apríl var hann ákærður í sex ákæruliðum fyrir mansal og öðrum sex fyrir að stuðla að vændi. Hann var í dag leiddur fyrir dómara þar sem hann kvaðst saklaus. Hann var dæmdur í gæsluvarðhald og verður hann ekki látinn laus nema gegn tryggingu upp á eina milljón Bandaríkjadollara.

Rodio gæti átt yfir höfði sér allt að 25 ára fangelsi verði hann fundinn sekur um glæpina sem hann er ákærður fyrir.

Saksóknari Suffolk-sýslu í New York, Tim Sini, segir Rodio hafa herjað sérstaklega á konur á þrítugsaldri sem háðar hafi verið fíkniefnum. Mansalshringur hans hafi verið starfræktur frá því í desember 2014 fram í febrúar 2018 og að um 20 konur hafi orðið fyrir barðinu á Rodio.

Rodio er sagður hafa orðið konunum úti um eiturlyf án endurgjalds, fyrst um sinn, til þess að vinna traust þeirra og gera þær háðar honum. Hann hafi síðan nýtt sér bága stöðu þeirra til þess að neyða þær til kynferðislegra athafna með öðrum mönnum.

Samkvæmt saksóknaranum máttu fórnarlömb Rodio hvergi í húsi foreldra hans vera nema í kjallaranum, sem var læstur að utan. Auk þess hafi engin salernisaðstaða verið til staðar í kjallaranum, heldur hafi konunum verið gert að gera þarfir sínar í þar til gerða fötu.

Rodio er talinn hafa auglýst vændi til sölu á vefsíðum á borð við Backpage og Craigslist. Þá er hann sagður hafa haldið stórum hluta greiðslna fyrir vændið sjálfur, það er að segja ef fórnarlömb hans fengu þá nokkuð greitt. Rodio ku þá hafa hótað þeim fórnarlömbum sínum sem neituðu að selja líkama sinn með ofbeldi eða með því að segjast ætla að hætta að sjá þeim fyrir fíkniefnum.

Foreldrar Rodio hafa neitað því að mansalið hafi verið gert út úr kjallara þeirra, en viðurkenna þó að Rodio hafi verið háður eiturlyfjum og þurfi nauðsynlega á hjálp að halda. Yfirvöld telja foreldrana ekki hafa tekið þátt í glæpastarfseminni né þá að þau hafi gerst sek um nokkuð annað ólöglegt.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.