Mourinho faldi sig í óhreina þvottinum og var næstum því dáinn

Það heyrðist ekki neitt í Jose Mourinho fyrstu vikurnar eftir að hann var rekinn frá Manchester United en portúgalski knattspyrnustjórinn kom aftur á móti til baka með látum.

Jose Mourinho lét nefnilega ýmislegt flakka í heimsókn sinni í sjónvarpsþátt beIN Sports og eitt af því var að viðurkenna það að „gróusaga“ frá Meistaradeildarleik fyrir að verða fjórtán árum var hreinn og beinn sannleikur eftir allt saman.

Mourinho viðurkenndi að hafa falið sig í körfu með óhreina þvottinum þegar hann mátti hvergi koma nálægt liði sínu í Meistaradeildarleik. Mourinho tók út leikbann í umræddum leik en notaði afar sérstaka aðferð til að leika á eftirlitsmenn UEFA.

Ensku blöðin höfðu skrifað um þetta mál árið 2007 eða tveimur árum eftir atvikið en höfðu engin alvöru sönnunargögn. Chelsea neitaði þessu meðal annars í sérstakri yfirlýsingu. Nú er hins vegar enginn vafi á því að Mourinho gerði allt til þess að hitta leikmenn sína fyrir leik, líka þótt að hann ætti að vera í banni.

Jose Mourinho has finally admitted he hid in a laundry basket in 2005 to get around a two-match UEFA ban and deliver Chelsea's team talk. pic.twitter.com/HxLFBOZpuD

— ESPN FC (@ESPNFC) January 20, 2019

Umræddur leikur var á milli Chelsea og Bayern München í átta liða úrslitunum Meistaradeildarinnar. Þetta var fyrri leikurinn og fór hann fram á Stamford Bridge. Eiður Smári Guðjohnsen lék allan leikinn og lagði upp eitt markið í 4-2 sigri. Chelsea tapaði seinni leiknum í Þýskalandi en vann 6-5 samanlagt.

„Ég fór inn í búningsklefann fyrr um daginn og var þar frá miðjum degi þar til klukkan sjö þegar leikurinn hófst. Ég vildi vera inn í klefa þegar leikmennirnir mínir mættu,“ sagði hinn 55 ára gamli knattspyrnustjóri í þættinum á beIN Sports.

„Ég komst inn í klefann án þess að einhver sá mig. Vandamálið var bara að komast aftur út. Búningsstjórinn Stewart Bannister setti mig þá ofan í körfuna með óhreina þvottinum. Það var smá op þannig að ég gat andað,“ lýsti Jose Mourinho.

„Svo þegar hann ætlaði að fara með körfuna út úr klefanum þá voru UEFA-mennirnir að fylgjast með því þær ætluðu sér að finna mig. Hann tók þá til þess ráðs að loka körfunni og þá gat ég ekki andað. Þegar hann loksins opnaði körfuna aftur þá var ég að deyja. Ég er að tala í alvörunni. Ég er með  innilokunarkennd. Ég lofa, þetta er satt,“ sagði Mourinho.