Man. City ætti að vera með sex stiga forystu á Liverpool

Hvort verður Liverpool eða Manchester City enskur meistari 2019? Það eru örugglega margir að velta því fyrir sér þessa dagana nú þegar lokaspretturinn er fram undan.

Sky Sport hefur gert heiðarlega tilraun til að reikna út hvort liðið vinnur í vor með því að greina alla hugsanlega tölfræði tengda liðunum í ensku úrvalsdeildinni í vetur.

Þar kemur líka í ljós að staðan í deildinni ætti að vera öðruvísi en hún er í dag. Liverpool er með fjögurra stiga forskot á Manchester City en útreikningar Sky Sports sýna fram á það að lukkan hefur verið í liði með lærisveinum Jürgen Klopp á þessu tímabili.

CITY OR LIVERPOOL?

We analyse the title race from every possible angle ??https://t.co/Pa7i1x2mGEpic.twitter.com/B3C5cmDNRl

— Sky Sports Premier League (@SkySportsPL) January 21, 2019

Samantekt Sky Sports er bæði ítarleg og skemmtileg og þar geta áhugasamir skoðað tölur liðanna tveggja fram og til baka.

Manchester City hélt lífi í titilvonum sínum með 2-1 sigri á Liverpool í fyrsta leik liðanna á nýju ári en bæði liðin hafa unnið sína leiki síðan þá. Liverpool liðið er aftur á móti farið að leka inn mörkum ólíkt því sem var fyrir áramót.

Liverpool er búið að vera á toppnum eftir sjö umferðir í röð eða síðan að liðið tók efsta sætið af Manchester City 8. desember síðastliðnum. City tapaði þá fyrir Chelsea en Liverpool skoraði þá fjögur mörk hjá Bournemouth.

Ein allra athyglisverðasta samantektin í þessari ítarlegu tölfræðigreiningu Sky Sports á liðum Liverpool og Manchester City snýst um hvernig þessi tvö lið hafa nýtt færin sín og yfirburði sína í ákveðnum leikjum. Tölfræðin heitir áætluð mörk eða „Expected Goals“ á ensku.

Samkvæmt þeirri tölfræði þá hefur lukkan svo sannarlega verið í liði með Liverpool sem hefur aðeins tapað stigum í sex leikjum á leiktíðinni. Tölfræði yfir áætluð mörk segir að Liverpool ætti að vera búið að tapa ellefu stigum í vetur en ekki bara níu stigum.

Liverpool hefði reyndar átt að vinna leikinn á móti Manchester City á Etihad í janúarbyrjun en í staðinn var lukkan í liði með Klopp og lærisveinum í leiknum á móti City (í október), Huddersfield og Arsenal.

Það er allt aðra sögu að segja af Manchester City liðinu sem hefur verið með yfirburði í öllum leikjum nema tveimur, leik á móti Leicester City á öðrum degi jóla og svo á móti Liverpool fyrr í þessum mánuði.

Samkvæmt tölfræðinni um áætluð mörk þá ætti Manchester City aðeins vera búið að tapa fimm stigum í vetur en liðið hefur tapað heilum þrettán stigum.

Hefðu liðin nýtt sín færi þá væri staðan allt önnur. Manchester City væri þá með 64 stig og sex stiga forystu á Liverpool-liðið.

Liverpool er nefnilega enn með fjögurra stiga forskot á Manchester City í stigatöflunni þrátt fyrir að skora færri mörk en City, eiga færri skot, eiga færri skot á mark og skapa færri færi.

Það er hægt að finna alla þessa útreikninga Sky Sports með því að smella hér.