Mark Clattenburg sakar Mo Salah um að reyna ná í gullskóinn með dýfingum

Mark Clattenburg, fyrrum dómari í ensku úrvalsdeildinni, setti fram samsæriskenningu um meintan leikaraskap Liverpool-mannsins Mohamed Salah.

Clattenburg er kominn í hóp með mörgum gagnrýnendum Egyptans sem þykir hafa fengið ódýr víti að undanförnu. Salah reyndi síðan að fiska víti á móti Crystal Palace þegar hann lét sig falla í teignum en ekkert var dæmt. Það atvik var aftur á móti nóg til að kalla á afar athyglisverð viðbrögð frá umræddum Mark Clattenburg.

„Mo Salah fór niður án þess að það væri snerting frá Mamadou Sakho,“ sagði Mark Clattenburg í viðtali við Daily Star og hélt svo áfram:

„Það skiptir engu máli hvort hann væri að biðja um víti eða ekki því hann var að reyna að plata Jonathan Moss dómara. Moss hefði átt að lyfta gula spjaldinu,“ sagði Clattenburg.

„Salah var gagnrýndur fyrir að fara of auðveldlega niður þegar hann fékk víti á móti Arsenal og Newcastle. Í öllum þessum kringumstæðum þá á hann ekki möguleika á því að skora og virðist velja það frekar að reyna að krækja í vítaspyrnu,“ sagði Clattenburg og nú er hann heldur betur kominn í samsæriskenningastuð.

„Salah tekur vítaspyrnurnar fyrir Liverpool og veit því að ef hann fær víti þá fær hann frítt skot á mark. Með því eykur hann líkurnar sínar á því að fá gullskóinn,“ sagði Clattenburg.

Clattenburg hefur líka tekið eftir einu þegar Mo Salah er að reyna að fiska vítaspyrnur.

„Eitt sem ég hef tekið eftir þegar Salah dettur til að reyna að fá víti er að þá fara hendurnar hans upp fyrir haus. Það er eitt af því sem dómarar eiga að horfa eftir þegar þeir meta það hvort um leikaraskap er að ræða eða ekki. Vanalega þegar þú dettur eftir brot þá fara hendurnar þínar niður til að verjast fallinu“ sagði Clattenburg.

„Þangað til að við fáum VAR í deildina þá ættu leikmenn að fá leikbann fyrir leikaraskap og þá skiptir engu hvort dómarinn hafi dæmt eða ekki,“ sagði Clattenburg.

Mark Clattenburg var á sínum tíma í hópi allra bestu dómara heims og sumarið 2016 þá dæmi hann þrjá stóra úrslitaleiki, í enska bikarnum, í Meistaradeildinni og í Evrópukeppninni. Hann hætti óvænt að dæma í febrúar 2017 til að taka við yfirmanni dómaramála hjá Knattspyrnusambandi Sádi Arabíu.