Gerir lítið úr „göldrum“ Ole Gunnars Solskjær

„Hver sem er hefði getað komið inn og gert það sem hann gerði,“ segir Paul Ince, fyrrum leikmaður Manchester United, um starf síðustu vikna hjá nýja knattspyrnustjóra félagsins.

Flestir spara ekki hrósið þegar þeir tala um Norðmanninn Ole Gunnar Solskjær en Ince er langt frá því að vera í þeim hópi.

Manchester United var á hraðri niðurleið og í tómu tjóni undir stjórn Jose Mourinho en hefur unnið alla sex leiki sína síðan að Norðmaðurinn Ole Gunnar Solskjær tók við.

Paul Ince finnst hinsvegar ekki mikið til hans koma og talar gegn því að Ole Gunnar Solskjær verði framtíðarstjóri Manchester United.

Ince vill að Mauricio Pochettino, núverandi knattspyrnustjóri Tottenham, verði stjóri United frá og með júní.

“Anyone could have gone in and done what he has done." -- At least one former @ManUtd player isn't buying the Ole Gunnar Solskjaer hype just yet.https://t.co/I237yRlFuz

— beIN SPORTS USA (@beINSPORTSUSA) January 16, 2019

„Við megum ekki láta Ole draga okkur inn. Ef við erum hreinskilin þá gat þetta ekki orðið verra hjá Manchester United en rétt áður en Jose Mourinho fór. Það var svart ský yfir öllum klúbbnum, yfir leikmönnunum, yfir stuðningsfólkinu og yfir starfsfólkinu. Það hafði mikil áhrif á leik liðsins,“ sagði Paul Ince í viðtali við Paddy Power.

„Ole kom inn sem maður sem allir þekktu og róaði öldurnar. Það lítur út fyrir að leikmennirnir hafi lagt meira á sig í framhaldinu. Liðið hefur rifið af sér fjötrana en það þýðir ekki að Ole sé rétti maðurinn í starfið. Ég hefði getað gert það sama og sömuleiðis Steve Bruce,“ sagði Ince.

„Hver sem er hefði getað það því það er ekki erfitt að gefa leikmönnum meira frjálsræði og bæta liðsandann,“ sagði Ince.

„Nú þarf félagið að finna mann sem getur fyrir fullri alvöru komið United upp í titilbaráttuna með City og Liverpool. Miðað við þá sem eru í boði þá er Pochettino rétti maðurinn,“ sagði Ince.

„Klúbburinn á ekki að taka fljótfærnislegar ákvarðanir núna. Ekki velja stjóra sem hefur náð að vinna sex leiki í röð þar sem fimm þeirra komu á móti lakari liðum. Ég hefði jafnvel séð Mourinho vinna þessa leiki,“ sagði Ince.

„Fólk segir að stóra prófið hafi verið á móti Tottenham en sá sigur féll til United þar sem Tottenham liðið átti ekki góðan leik í að nýta færin og De Gea var frábær. Þeir voru ekki betri en Tottenham,“ sagði Ince.

„Það er auðvelt að hoppa upp á vagninn en félagið þarf að fara varlega. Ég held að Glazers fjölskyldan og Ed Woodward ætli sér að finna rétta maninn fyrir næstu árin en ekki rétta manninn núna,“ sagði Ince.

 „Þetta er mjög erfitt starf sem setur mikla pressu á meira segja bestu stjórana. En ef Ole heldur þessu áfram á móti liðum eins og Arsenal, PSG og Liverpool þá gæti þeim snúist hugur. Ég vil ekki gera lítið úr því hvernig hann hefur endurvakið vonina og komið liðinu aftur í gang en það þýðir ekki að hann eigi að fá starfið,“ sagði Ince.