Með flest varin skot en flest mörkin fengin á sig

Lífið leikur ekki við fyrrverandi aðalmarkvörð enska landsliðsins, Joe Hart, þessa dagana en hann stendur í botnbaráttu með Jóhanni Berg Guðmundssyni og félögum í Burnley.

Hart fékk á sig fimm mörk á móti Gylfa Þór og félögum í Everton í gær en Gylfi sendi Joe Hart í rangt horn þegar að hann skoraði úr vítaspyrnu og kom gestunum úr Bítlaborginni í 3-0.

Sjá einnig:Sjáðu tvennuna hjá Pogba, áttunda mark Gylfa og öll 29 jólamörkin í enska boltanum

Enski markvörðurinn er nú búinn að fá á sig 41 mark, flest allra markvarða í ensku úrvalsdeildinni en mest hefur Hart fengið á sig 42 mörk á heilli leiktíð. Hann er því nokkuð augljóslega að fara að slá það „met“ sitt nema að Burnley haldi hreinu það sem eftir er af tímabilinu.

Burnley-liðið byggði frábæran árangur sinn á síðustu leiktíð á gríðarlega sterkum varnarleik en lærisveinar Sean Dyche fengu aðeins á sig 39 mörk allt síðasta tímabil. Liðið er því nú þegar búið að fá á sig fleiri mörk en í fyrra.

Það er nóg að gera hjá Hart í markinu hjá Burnley því þrátt fyrir að vera búinn að fá á sig flest mörk er hann sá markvörður sem er búinn að verja flest skot í ensku úrvalsdeildinni.

Hart er búinn að verja 76 skot, fimm fleiri en Neil Etheridge, markvörður Cardiff. Almennt eru markverðir botnliðanna ofarlega á þessum lista þar sem að þau eru mikið í vörn en athygli vekur að David De Gea er í fjórða sæti með 64 skot varin.

Joe Hart er búinn að halda fjórum sinnum hreinu í 19 leikjum á tímabilinu en Alisson Becker, markvörður Liverpool, stefnir hraðbyri í átt að gullhanskanum en hann er búinn að halda tólf sinnum hreinu fjórum sinnum oftar en Keba Arrizabalaga, markvörður Chelsea.