Hamrén í ítarlegu viðtali: Það var gott að deila því hvernig mér leið

Það var nokkuð létt yfir Svíanum Erik Hamrén er ég settist niður með honum í blíðunni fyrir utan hótel íslenska liðsins í Saint-Brieuc. Við fórum yfir víðan völl og ég byrjaði að spyrja hann að því hvort eitthvað hefði komið honum á óvart síðan hann tók við landsliðinu?

„Ég vissi að það kæmu fyrst erfiðir leikir og ég hefði lítinn tíma til þess að kynnast leikmönnum. Þetta hefur verið svipað og ég bjóst við,“ segir Hamrén en það hefur ekki margt komið honum á óvart.

„Ég hafði reynslu af íslenskum leikmönnum fyrir og vissi að Íslendingar væru gott fólk. Mér líkar vel við samstarfsfólk mitt og gaman að kynnast öllum. Eina sem hefur komið mér á óvart er að sjá hversu margir knattspyrnuvellir eru út um allt. Ég elska það. Ísland er betra en Svíþjóð í þessum efnum sem og í þjálfun ungmenna. Það kom mér á óvart því ég vissi það ekki.“

Er Hamrén tilkynnti leikmannahópinn fyrir komandi leiki mætti hann vopnaður með skrifaða ræðu sem hann flutti af nokkrum krafti.

„Mér fannst gott að deila því hvernig mér leið. Enskan er ekki mitt móðurmál og því þarf ég að undirbúa ræðurnar. Mér fannst mikilvægt að gefa útskýringu á því hvernig mér leið. Við erum að undirbúa liðið fyrir undankeppni EM og mikilvægt að koma því á framfæri. Ég mun halda fleiri svona ræður af virðingu við ykkur blaðamenn og fólkið í landinu sem ég tala við í gegnum ykkur,“ sagði Hamrén en hvað var með eldmóðinn í honum í ræðunni?

„Ég var ekki ánægður með okkar fyrstu leiki og sérstaklega leikinn gegn Sviss. Það kom mér á óvart hvernig við töpuðum fyrsta leiknum. Íslenska liðið getur tapað en við megum ekki tapa á svona hátt.“

Eftir tvo daga mæta strákarnir hans Hamrén sjálfum heimsmeisturunum. Það er álag á Svíanum og það gæti aukist eftir Frakkaleikinn.

„Þetta snýst allt um viðhorf og ég reyni að hugsa um jákvæðu hlutina. Ég sá liðið bæta sig milli leikja en það er margt sem þarf að bæta enn frekar. Þetta verður mjög erfiður leikur en svona leikur mun hjálpa okkur að verða betra lið. Það er ekki hægt að fela veikleikana gegn bestu liðunum og svona leikir sýna hvar við þurfum að bæta okkur. Ég mun njóta þessa leiks,“ segir Svíinn en fyrsti leikur hans með sænska landsliðið á sínum tíma var gegn Ítalíu sem þá var ríkjandi heimsmeistari.

„Ég vil sjá alvöru viðhorf og stolt hjá liðinu í þessum leik. Það skiptir mig mestu máli í fótbolta og við höfum mikið rætt um það. Ég vona að við sýnum framfarir í þessum leik. Annars munu Frakkar refsa okkur.“