Enski boltinn

Leikmenn Man. United: Eitt tap í viðbót og þá verður Mourinho rekinn

Óskar Ófeigur Jónsson skrifar
Jose Mourinho og Luke Shaw eftir síðasta leik.
Jose Mourinho og Luke Shaw eftir síðasta leik. Vísir/Getty
Leikmenn og starfsmenn Manchester United líta svo á að Jose Mourinho fái bara einn leik til viðbótar til að bjarga starfi sínu á Old Trafford.

Enska blaðið Daily Mail hefur heimildir fyrir því að tap á móti Jóhanni Berg Guðmundssyni og félögum í Burnley um næstu helgi myndi þýða að Mourinho yrði látinn taka pokann sinn.

Því trúa að minnsta kosti leikmenn og starfsmenn Manchester United sem blaðamenn Daily Mail hleruðu.

Leikur Burnley og Manchester United fer fram á sunnudaginn en United-liðið hefur nú tapað tveimur leikjum í röð og fengið á sig sex mörk í þeim.

Tapleikirnir á móti Brighton (2-3) og Tottenham (0-3) hafa sett gríðarlega pressu á portúgalska stjórann sem hefur ekki verið í alltof góðu skapi að undanförnu.





Jose Mourinho strunsaði út af blaðamannafundi eftir Tottenham leikinn en ekki áður en að hann minnti blaðamenn á það að hann væri búinn að vinna ensku úrvalsdeildina oftar en allir hinir nítján stjórar deildarinnar til samans.

Mourinho hafði áður eytt dágóðri stundu inn á vellinum í að hughreysta leikmenn sína og klappa síðan lengi fyrir þeim stuðningsmönnum Manchester United sem höfðu ekki yfirgefið leikvanginn í reiðiskasti.

Enskir miðlar hafa skrifað um það að Zinedine Zidane bíði tilbúinn á kantinum en fyrrum knattspyrnustjóri Real Madrid er sagður hafa mikinn áhuga á stjórastólnum hjá Manchester United.

Eitt er víst að Jose Mourinho er í draumastarfinu þar sem hann fær fimmtán milljónir punda í árslaun. Portúgalinn er því aldrei að fara hætta sjálfur og brottrekstur hans myndi þýða stór útgjöld fyrir Manchester United.





Daily Mail er líka með greiningu á vandamálastöðu Manchester United liðsins sem eru miðverðirnir. Jose Mourinho hefur þegar reynt sextán mismunandi útgáfur af þessum mikilvæga hluta varnarinnar í þeim 79 úrvalsleikjum sem hann hefur stjórnað liði United.

Jose Mourinho hefur ennfremur gert 235 breytingar á byrjunarliði sínu síðan í ágúst 2016 en á sama tíma hefur Pep Guardola hjá Manchester City gert 219 breytingar og Jürgen Klopp hjá Liverpool hefur gert 189 breytingar

Knattspyrnustjóri Tottenham, Mauricio Pochettino hefur síðan aðeins gert 177 breytingar á byrjunarliði sínu eða 58 færri en Jose Mourinho hefur gert á sama tíma.

Enski boltinn

Mest lesið


Fleiri fréttir

Sjá meira


×

Mest lesið