Ekkert lið í ensku úrvalsdeildinni með fleiri Evrópumeistara en Stoke

Ekkert lið í ensku úrvalsdeildinni er með fleiri leikmenn innan sinna raða sem hafa unnið Meistaradeild Evrópu en Stoke City.

Stoke gekk í morgun frá eins árs lánssamningi á Jesé Rodríguez frá Paris Saint-Germain.

Jesé vann Meistaradeildina með uppeldisfélaginu Real Madrid 2014 og 2016. Stoke er nú með fleiri Evrópumeistara í leikmannahópi sínum en nokkurt annað lið í ensku úrvalsdeildinni.

Auk Jesé hafa Xherdan Shaqiri, Bojan Krkic, Ibrahim Afellay og Darren Fletcher unnið Meistaradeildina á ferlinum.

Stoke er með fleiri Evrópumeistara innan sinna raða en Manchester United, Arsenal og Liverpool samanlagt.

Chelsea er með næstflesta Evrópumeistara í sínum hóp, eða fjóra. Það eru þeir Pedro Rodríguez, Gary Cahill, Álvaro Morata og David Luiz. Cahill og Luiz unnu Meistaradeildina með Chelsea 2012.

Manchester City er með þrjá Evrópumeistara í sínum leikmannahóp, United tvo og Arsenal og Liverpool einn hvor.