Sú besta til Man City

Carli Lloyd, besta knattspyrnukona heims, er gengin í raðir Englandsmeistara Manchester City.

Lloyd, sem er 34 ára, hefur leikið í Bandaríkjunum allan sinn feril.

Lloyd gerði stuttan samning við City en hún mun leika með liðinu fram í byrjun júní. Á þeim tíma spilar City í deildinni heima fyrir, ensku bikarkeppninni og Meistaradeild Evrópu.

Lloyd hefur leikið 232 landsleiki fyrir Bandaríkin og skorað 96 mörk. Þrjú þeirra komu á aðeins 13 mínútna kafla gegn Japan í úrslitaleik HM fyrir tveimur árum. Lloyd skoraði alls sex mörk á HM og var valin besti leikmaður mótsins.

Lloyd varð Ólympíumeistari með bandaríska landsliðinu 2008 og 2012.

Hún hefur tvisvar sinnum verið valin besti leikmaður heims; 2015 og 2016.