Swift segir mann hafa káfað á berum rassi hennar

Söngkonan Taylor Swift segir fyrrverandi útvarpsmann hafa káfað á berum rassi hennar í myndatöku árið 2013. Útvarpsmaðurinn, sem heitir David Mueller, hefur kært Swift og segir ásakanir hennar hafa kostað hann starfið. Hún kærði hann á móti fyrir kynferðisofbeldi. Mueller fer fram á þrjár milljónir dala (Um 318 milljónir króna) í skaðabætur en Swift fer fram á að hann verði dæmdur til að greiða einn dal.

Swift bar vitni í dómsal í dag þar sem hún sagðist hafa reynt að komast eins langt frá Mueller og kærustu hans eftir myndatökuna. Hún segist hafa verið í áfalli eftir það en hún hafi ekki viljað valda aðdáendum sínum vonbrigðum og lét hún taka myndir af sér með nokkrum tugum einstaklinga sem biðu í röð.

Þá sagði hún hafa sagt ljósmyndara sínum frá hinu meinta káfi um fimmtán mínútum seinna.

Samkvæmt frétt AP fréttaveitunnar var Swift innt eftir viðbrögðum sínum þegar hún frétti að Mueller hefði misst vinnu sína. Hún sagðist þó ekki ætla að leyfa Mueller né lögmanni hans að láta henni líða eins og það væri henni að kenna.

Þá var sýnd mynd í réttarsalnum sem Swift sagði að sýndi það augnablik þegar Mueller káfaði á henni. Hún segir hann hafa gripið í sig og haldið takinu um stund. Lögmaður Mueller spurði Swift, samkvæmt Variety, af hverju ekki mætti sjá á myndinni að búið væri að lyfta pilsi hennar.

„Af því að rassinn á mér er staðsettur aftan á líkama mínum,“ svaraði Swift.

Mueller sagði í gær að myndin gæfi ekki rétta mynd að því sem hefði gerst. Hann sagði hendi sína hafa snert pils Swift þegar hann tók utan um hana. Hann hafi hins vegar ekki snert rass hennar.