Ónarr, Eros, Vök, Natasja og Nala leyfð

Þrjóska nýbakaðra foreldra skilaði sér í því að nafn sonar þeirra fékkst samþykkt af mannanafnanefnd. Fimm ný nöfn bættust á mannanafnaskrá í lok síðasta mánaðar en úrskurðirnir voru birtir í gær.

Í desember í fyrra barst nefndinni beiðni um að nafnið Ónarr yrði fært á mannanafnaskrá. Þeirri beiðni var hafnað með úrskurði í upphafi árs. Taldi nefndin að rithátturinn samræmdist ekki almennum ritreglum og að það hefði ekki hefðast í málið.

Foreldrar drengsins fóru fram á endurupptöku og rökstuddu beiðnina í sex liðum. Bentu þau meðal annars á að nöfnin Óttarr og Heiðar séu til og að íslenskan sé í stöðugri mótun. Nefndin hafnaði þeim rökstuðningi en þar sem nafnið kemur fyrir í Snorra-Eddu og Heimskringlu var fallist á beiðni um það.

Þá var karlmannsnafnið Eros samþykkt sem og kvenmannsnöfnin Vök og Nala. Beiðni um nafnið Natasha var hafnað en rithátturinn Natasja fékkst hins vegar samþykktur.