Þingmaður með meira en milljón á mánuði en býr á Görðunum

Jón Þór Ólafsson, þingmaður Pírata, segir að það væri óeðlilegt ef starf hans myndi skerða rétt maka síns til búsetu á stúdentagörðum.

Sem kunnugt er náði Jón Þór kjöri sem þingmaður í alþingiskosningunum 2013 en sagði af sér þingmennsku þegar kjörtímabilið var hálfnað. Eftir að hann hætti á þingi komst kona hans inn á stúdentagarða en hún stundar nám við Háskóla Íslands.

„Það er konan mín sem leigir íbúðina en ekki ég. Það er hluti af hennar öryggi að hafa stúdentaíbúð og ekki hægt að spyrða það við manninn hennar,“ segir Jón Þór. Á kjördag síðasta haust kvað kjararáð upp úrskurð um kjör þingmanna en laun þeirra eru rúmlega 1,1 milljón króna. Jón Þór er þriðji varaforseti Alþingis og nýtur því 15 prósenta álags á þingfararkaupið. Hann er því með rúmlega 1,26 milljónir í laun.

„Eftir að ég komst á þing aftur vorum við ekkert að spá í því að róta upp fjölskyldunni. Ég veit ekki einu sinni hvað ég ætla að vera lengi á þingi,“ segir Jón Þór. „Þetta er hennar réttur og í raun partur af stærri umræðu. Eiga réttindi fólks að tengjast eða skerðast út af maka þínum? Fólk verður að geta verið sjálfstætt þótt það eigi maka.“

„Tekjur maka eru ekki teknar með í reikninginn eins og úthlutunarreglurnar eru núna,“ segir Rebekka Sigurðardóttir, upplýsingafulltrúi Félagsstofnunar stúdenta (FS). Hún segir að ákvarðanir um breytingar á úthlutunarreglunum séu teknar af stjórn FS. Við þá vinnu sé haft samráð við Stúdentaráð Háskóla Íslands (SHÍ).

Röskva vann stórsigur í kosningunum til Stúdentaráðs í upphafi febrúar en nýtt ráð tók við á dögunum. Fyrsti fundur ráðsins eftir skiptafund er á dagskránni næsta þriðjudag.

„Þetta er komið inn á borð til okkar í Stúdentaráði og verður til umræðu á næstu fundum ráðsins,“ segir Ási Þórðarson, varaformaður SHÍ. „Við munum m.a. fá erindi frá FS um úthlutunarreglurnar og ráðið mun taka það til umræðu hvort, og þá að hvaða leyti, tilefni sé til breytinga á þeim.“