14 milljarða varnarsamningur milli Breta og Tyrkja

Stjórnvöld í Bretlandi komust í dag að samkomulagi við Tyrki um að þróa herþotur fyrir tyrkneska flugherinn.  Samningurinn hljóðar upp á 100 milljónir punda, eða tæplega 14,6 milljarða íslenskra króna.

Þetta var tilkynnt að loknum fundi Theresu May, forsætisráðherra Bretlands,  og Recep Tayyip Erdogan Tyrklandsforseta síðdegis í dag. Leiðtogarnir ræddu varnarmálasamning þjóðanna tveggja og hvernig efla megi viðskiptatengsl þeirra á milli á fundinum.

Haft er eftir May á vef breska ríkisútvarpsins að Bretar muni efla viðskipti sín við Tyrki og að samkomulagið undirstriki mikilvægi Bretlands sem þjóð á sviði alþjóðaviðskipta. Þá segir Erdogan að Tyrkir muni auka viðskipti sín í 16 milljarða dollara, eða 2,3 milljarða íslenskra króna.

Samningurinn snýr að því að breski vopnaframleiðandinn BAE Systems og tyrkneski herþotuframleiðandinn þrói herþotur fyrir flugherinn.