Mourinho segir að aðeins Young fái að yfirgefa félagið

Jose Mourinho, knattspyrnustjóri Manchester United, segist ekki vera viss um framtíð Ashley Young hjá félaginu en hann segir að engir aðrir leikmenn fái að yfirgefa félagið í félagsskiptaglugganum.

Young sem hefur leikið 150 leiki í öllum keppnum fyrir Manchester United var ekki í hóp gegn Wigan í enska bikarnum í dag en tækifæri hans hafa verið af skornum skammti í vetur.

Manchester United hefur þegar selt Memphis Depay og Morgan Schneiderlin frá félaginu en aðspurður hvort það væru fleiri menn á förum sagði Mourinho að aðeins Young fengi að fara.

„Eini leikmaðurinn sem gæti farið frá félaginu í janúarglugganum er Ashley Young, ég vonast til þess að hann verði áfram og myndi sakna hans en ég mun ekki útiloka það að hann fari. Þessvegna var hann ekki í hópnum í dag, ég vildi gefa öðrum tækifæri.“