Tíu leikmenn Man. City náðu að vinna Burnley

Þó svo Fernandinho hafi verið rekinn af velli fyrir groddalega tæklingu á Jóhann Berg Guðmundsson þá náði Man. City samt að vinna leikinn gegn Burnley, 2-1.

Í stöðunni 0-0 var Fernandinho rekinn af velli á 32. mínútu fyrir tæklinguna skrautlegu. Markalaust var í leikhléi en Gael Clichy kom City yfir á 58. mínútu. Sergio Aguero kom City í 2-0 fjórum mínútum síðar.

Ben Mee minnkaði muninn fyrir Burnley er 20 mínútur lifðu leiks. Burnley náði að setja pressu á City undir lokin en nýtti ekki færin.

Jóhann Berg fór af velli á 59. mínútu leiksins.

Burnley siglir lygnan sjó um miðja deild en City er komið upp í þriðja sæti.