Musa skaut Leicester áfram

Ahmed Musa tryggði Leicester City farseðilinn í 4. umferð ensku bikarkeppninnar þegar hann skoraði bæði mörkin í 1-2 sigri liðsins á Everton á Goodison Park í dag.

Musa kom inn á sem varamaður fyrir Leonardo Ulloa á 35. mínútu og hann reyndist hetja Englandsmeistaranna.

Everton komst yfir á 63. mínútu þegar Romelu Lukaku skoraði eftir sendingu Gerard Deulofeu.

Aðeins þremur mínútum síðar jafnaði Musa metin og á 71. mínútu skoraði hann svo öðru sinni.

Það reyndist vera sigurmarkið og Leicester-menn fara því glaðir aftur heim frá Guttagarði.