Fullyrða að Pútín hafi fyrirskipað afskipti af forsetakosningunum

Yfirmenn leyniþjónustustofnana Bandaríkjanna hafa opinberað skýrslu um afskipti Rússa af forsetakosningunum í Bandaríkjunum í nóvember síðastliðnum.

„Við fullyrðum af miklu öryggi að Vladimír Pútín, forseti Rússlands, fyrirskipaði afskipti af forsetakosningunum í Bandaríkjunum 2016,“ segir í skýrslunni.

„Markmið þeirra voru að grafa undan trúverðugleika á lýðræði í Bandaríkjanum, sverta orðspor Hillary Clinton og skaða kjörþokka hennar og mögulega forsetatíð. Við teljum enn fremur að Pútín og rússneska ríkisstjórnin hafi haft augljóst dálæti á verðandi Bandaríkjaforseta, Donald Trump.“

Yfirvöld telja að tilefni afskiptanna hafi verið hefnd Pútín gegn Clinton.

„Hann hefur opinberlega kennt henni um að hafa hvatt til fjöldamótmæla gegn stjórn sinni á árunum 2011 og 2012.“

Donald Trump, verðandi Bandaríkjaforseti, fékk skýrslu um stöðu mála fyrr í dag og sagði hann fundinn hafa verið uppbyggilegan, en neitaði að taka opinberlega undir niðurstöðu skýrslunnar.

Trump sagði að afskiptin hefðu ekki haft áhrif á niðurstöðu kosninganna, en í skýrslunni segjast yfirvöld ekki vera í stöðu til að meta það að svo stöddu.