Hin umdeilda Hope Solo vill stýra sambandinu sem rak hana

Hope Sole, fyrrverandi landsliðsmarkvörður Bandaríkjanna og einn besti markvörður sögunnar í kvennaboltanum, hefur ákveðið að bjóða sig fram til forseta bandaríska knattspyrnusambandsins.

Þessi 36 ára gamli umdeildi leikmaður bætist í annars stóran hóp þeirra sem vilja stýra bandarískum fótbolta næstu árin en frambjóðendur hafa hrúgast inn eftir að ljóst var að sitjandi forseti, Sunil Gulati, ákvað að sækjast ekki eftir endurkjöri.

Bandaríska karlalandsliðið komst ekki á HM í fyrsta sinn síðan 1986 og telja allir frambjóðendur sig vera með lausnina á vandamálum bandaríska boltans.

Hope Solo kynnti 1.600 orða aðgerðaráætlun sína á Facebook í gærkvöldi en hún tekur undir orð margra um að það kosti hreinlega alltof mikið fyrir unga krakka að fá góða þjálfun. Foreldrar hennar áttu mjög erfitt með að standa undir greiðslum fyrir æfingatíma hennar í æsku og er það ein helsta ástæða þess að hún býður sig fram.

Það yrði áhugavert ef Solo yrði kjörin forseti sambandsins því það sama og rak hana úr landsliðinu á síðasta ári eftir að hún sagði að leikmenn sænska landsliðsins væru aumingjar fyrir að liggja bara í vörn í leik liðanna á Ólympíuleikunum.

Henni var þá sett í sex mánaða bann sem gerði út um landsliðsferil hennar, en árið 2015 var hún sett í eins mánaðar langt bann fyrir heimilisofbeldi. Solo er ansi umdeild en hefur engu að síður verið mikill leiðtogi í bandaríska liðinu og inn á vellinum mikil fyrirmynd.

Hún vann tvenn gullverðlaun á Ólympíuleikum með bandaríska landsliðinu og varð heimsmeistari með því árið 2015.