Coutinho: Þetta var erfiður mánuður

Philipe Coutinho hefur loks rofið þögnina eftir athyglisvert sumar hjá honum en hann vildi ólmur ganga til liðs við Barcelona og lagði fram formlega beiðni um að vera seldur.

Coutinho segir að það hafi verið erfitt að hunsa áhuga frá liði á borð við Barcelona en nú sé hann með hugann við Liverpool.

„Þetta var erfiður mánuður fyrir mig og eins og ég hef sagt þá var það heiður að fá tilboð frá Barcelona en það er einnig heiður að fá að klæðast treyju Liverpool, þannig núna mun ég njóta þess heiðurs.“

„Þetta var starfstilboð og stundum hefur maður áhuga á slíkum starfstilboðum og stundum ekki. Ég held að flestir viti að ég hafði áhuga á að fara og fjölskyldan mín vissi það líka.“

Coutinho spilaði sinn fyrsta leik fyrir Liverpool í deildinni í gær þegar liðið gerði jafntefli gegn Burnley á Anfield.