Hnífsstunguárás í Vesturbæ: Sá grunaði íbúi á stúdentagörðunum

Rannsókn lögreglu á hnífsstunguárás sem varð við stúdentagarðana á Sæmundargötu í Reykjavík aðfaranótt sunnudags er á viðkvæmu stigi að sögn Árna Þórs Sigmundssonar, aðstoðaryfirlögregluþjóns hjá lögreglunni á höfuðborgarsvæðinu.

Félagsstofnun stúdenta sendi íbúum á görðunum tölvupóst í gær. Í honum var haft eftir lögreglu að mennirnir tengdust ekki stúdentagörðunum en Árni Þór kveðst ekki vita hvaðan stofnunin hafi þær upplýsingar. Sjálfur hafi hann ekki veitt þær en eftir því sem Vísir kemst næst er sá grunaði íbúi á stúdentagörðunum. Árni Þór segist ekkert geta tjáð sig um það enda sé það aukaatriði í rannsókninni hvar viðkomandi búi.

Báðir nemendur við Háskóla Íslands

Enn á eftir að yfirheyra nokkur vitni og segir Árni að stefnt sé á að ljúka skýrslutökum í dag. Nokkur vitni voru að árásinni en enginn annar er grunaður um þátttöku í henni. Það verður svo metið í dag eða á morgun hvort að krafist verði áframhaldandi gæsluvarðhalds yfir meintum árásarmanni en það rennur út á morgun.

Manninum sem stunginn var í bakið er enn haldið sofandi í öndunarvél. Hann er fæddur árið 1989 líkt og hinn grunaði en mennirnir tveir eru félagar. Þeir eru báðir nemendur við Háskóla Íslands, hinn grunaði við lagadeild og sá sem fyrir árásinni varð við viðskipta-og hagfræðideild.

Hvorugur komið við sögu lögreglu áður

Samkvæmt heimildum fréttastofu snerist rifrildi mannanna um þriðja aðila en Árni Þór segist ekki geta tjáð sig um það. Þá vill hann hvorki upplýsa um það hvort að vopnið hafi fundist né hvort að árásarmaðurinn hafi játað. Hvorugur mannanna hefur komið við sögu lögreglu áður, að sögn Árna Þórs.

„Það er ekki alltaf að menn eigi sögu. En málið er mjög alvarlegt. Það er ekki alltaf bundið við það að menn eigi einhvern feril. Þessir menn eiga ekki feril hjá lögreglu,“ segir Árni.