Minnst 500 látnir í sókn stjórnarhersins

Minnst 500 manns hafa fallið síðan að sókn stjórnarhers Sýrlands hófst við Aleppo í byrjun mánaðarins. Samtökin Syrian Observatory for Human Rights, sem rekur umfangsmikið net tengiliða í Sýrlandi, segist hafa staðfest að 506 hafi fallið. Þar á meðal eru 23 börn sem létu lífið í loftárás í Aleppo þann 1. febrúar.

„Minnst 143 hermenn, 274 uppreisnar- og vígamenn og 89 borgarar féllu frá 1. febrúar fram til þriðjudags,“ segir Rami Abdel Rahman, framkvæmdastjóri SOFHR.

Í frétt AFP kemur fram að þar að auki hafi 14 hermenn frá Íran og þrír meðlimir Hezbollah fallið í bardögum. Meðal uppreisnar- og vígamanna eru rúmlega hundrað erlendir menn.

Stjórnarherinn hefur sótt fram nærri Aleppo í þessum mánuði undir skjóli loftárása Rússa og eru nálægt því að umkringja borgina. Hluti borgarinnar er í haldi uppreisnarmanna. Tugir þúsunda hafa flúið frá borginni að landamærum Tyrklands og hafa Sameinuðu þjóðirnar varað við því að 300 þúsund manns til viðbótar séu í hættu.